Tripura : CM-in Bangladesh PM hnenah lakhuihthei Kg 500 a thawn

Tripura chief minister Manik Saha chuan Pathianni khan Agartala-Akhaura Integrated Check Post kaltlangin Bangladesh prime minister Sheikh Hasina hnenah lakhuihthei (queen pineapple) Kg 500 a thawn.

Dipak Baidya, Assistant Director of Horticulture and Soil Conservation chuan Bangladesh PM hnenah hian lakhuihthei paruk zel awmna bawm 100 chu Tripura CM hminga thawn chhuah a nih tih a sawi. Baidya chuan Bangladesh leh Tripura chu tunhma aṭang tawha ṭhianṭha an ni tiin hetianga thilpek in pek tawn hian an inlaichinna tihngheh kawngah a pui a ni, a ti. Baidya chuan khawvel pum huap pawha a ṭha ber pawl, queen pineapple chu an inṭhianṭhatna tihchak a nih zel theih nan an thawn chhuak tih a sawi bawk.

Queen pineapple hi Tripura state fruit niin Geographical Indication (GI) tag pawh pek a ni tawh a ni. Tripura hian an state chhunga an tharchhuah hi ram hrang hrangah an thawn chhuak ṭhin a, June thla laihawl khan Oman lamah Kg 600 thawn chhuah niin Holland-ah thawn chhuak tura inbiakna neih mek a ni a, Dubai-ah metric ton 5 thawn turin order an hmu bawk a ni.