Raltlan buaina siamte kan dim dawn lo : Assam IGP

Assam police chuan Cachar district-a Jiribam, Manipur aṭanga raltlante chhinchhiah hna an thawk mek a, Assam police leh district thuneitute chuan raltlante chu buaina chawk chhuak zawnga khawsa lo turin an chah. Police-te hian Cachar district-ah hian door-to-door survey neiin buaina chhuak vanga inhumhimna zawnga raltlante chu an chhinchhiah a ni.

Assam Inspector General of Police (Law and Order) Prasanta Kumar Bhuiyan chuan buaina chawk chhuak zawnga khawsate chu an dim dawn lo tih sawiin "Helai hi Manipur ni loin Assam a ni, hman ata firfiaka chetna kan do let ṭhin a, tunah pawh hian dan phal loh thil tite chu kan zuah lo ang" a ti. Jiribam district, Manipur-a buaina chhuak vangin state ṭhenawm Assam-a Cachar district-ah hian mi 2,000 chuangin inhumhimna zawngin an raltlan mek a ni.

Assam police officer-te hian Manipur nena an ramri enfiahin Jiribam-a buaina chu Assam lama kangkai lo turin hma an la a ni. Ramri chu lei lam leh lui lama venghim turin commando battalion dah an ni a, anni hi ramriah patrol-in Cachar-ah buaina a kan kai loh nan venhim hna an thawk ṭhin. Venhim hna mai bakah hian raltlan chhinchhiah hna an kalpui tih Bhuiyan chuan a sawi a, hetiang an tih chhan chu buainain a nghawngte chauh lo lut se an tih vang niin dan phal loh thil sual tih tumte ven nana ti an ni tih a sawi.

Jiribam boruak hian ralmuan lam a la pan mai thei loa, tlai lama curfew puan chu chhunzawm a la ni. Assam hian Jiribam nena inhnaih tak, Cachar district-ah hian buaina a chhuah ve mai a hlau a, hemi vang hian venhimna an tikhauh lehzual a ni.