Lok Sabha-ah thutiam lak laiin 'Manipur, Manipur' tiin eptute au

Parliament session neih mekah, Lok Sabha MP tharte chu rinawmna thutiam tira lak luh an ni. MP lakluhnaah hian hmarchhak state-a chi leh chi inkara buaina chhuak vanga kum khat chuang tharum thawhna thlenna state, Manipur MP pahnihten thutiam an lak laiin Parliament chhungah "Manipur, Manipur' tia eptu lam au thawm a ring hle.

Manipur-a bial pahnih - Inner Manipur leh Outer Manipur aṭanga thlan tlin, Congress MP pahnih Alfred Kanngam Arthur leh Angomcha Bimol Akoijam te chu Thawhlehni khan Lok Sabha member atan lak luh an ni. Outer Manipur MP Alfred Kanngam chuan thutiam a lak zawh hian Manipur tan dik taka rorel tur leh India chhanhim a ngai tih a sawi a ni. Inner Manipur MP Akoijam chuan Meitei ṭawngin thutiam a la ve bawk.

Manipur Con­gress president K Meghachandra chuan Parliament session neih mekah an party chuan Manipur buaina chungchang sawi chhuah an tum tih a sawi. He thu hi Congress president Mallikarjun Kharge leh Congress kulhpui Rahul Gandhi te nen an inkawm hnuah a puang a ni. Meghachandra chuan Kharge leh Gandhi te nen an state chhunga thil thleng hrang hrang chipchiar takin an sawi ho tih a sawi a, Manipur buaina chungchangah sorkar tan zawhna an nei dawn tih a sawi.