Tripura : Chak zawka hna thawh nan Project Monitoring Unit tlangzarh

Tripura sorkar chuan state chhunga central scheme aṭanga project an dawnte chak zawka pawm a nih a, hnathawh tihkhawtlai a nih loh nan Project Monitoring Unit (PMU) a tlangzarh. PMU hi Tripura Planning and Coordination minister, Pranajit Singha Roy chuan Thawhlehni khan a tlangzarh a ni.

PMU hi central scheme aṭanga project rawn kalah rang zawka hna ṭan a nih theih nana hma la tur a ni dawn a, hemi bakah hian department-te chu hmalam huna project an khawih turah thurawn a pe ṭhin bawk ang. PMU pual hian kum thum chhunga an hman tur Rs vbc 15 ruahman niin, Planning minister Roy chuan PMU atana consulting firm thlan nan Tripura sorkar chuan e-tender tichhuakin Ernst & Young LLP (EY) chu he project atan hian thlan an nih tih a sawi.

EY LLP hnuaia kawng hrang hranga mithiam 14 thlan chhuahte chuan Tripura sorkar hnuaia department emaw sector 14 emaw tan project an duansak ṭhin dawn a ni. Heng mithiam bik 14 awmna team hian concept note siam, DPR buatsaih leh project a puitlin theih nana tihtur ṭulte an ti ṭhin ang. Roy chuan PMU chu sum lam ani emaw thiamna ngai bik thil a ni emaw kawng dang engah pawh project chak zawka kalpui a nih theih nan state sorkarin a din a ni, a ti.