Assam : APSC thubuai chhuichiangtu SIT report Court-in hnawl

Assam Public Service Commission (APSC) hnalak dana thil fel lo awm nia hriat chhuitu, Special Investigation Team (SIT) chuan report thehlut mah se Special Judge Court chuan a hnawlsak a, chhuichianna kalpui nawn leh turin thu a pe. Court hian SIT aṭang hian investigating officer, Pratik Thube ban turin thupek a chhuah bawk.

APSC Combined Competitive Examinations (CEE) kum 2013 leh 2014 a neihah khan officer 50 lai dik lo taka lak a ni tiin justice Biplab Kumar Sharma kaihhruai commission chuan report a thehlut a, he commission report avang hian APSC hna lak dan chhuichiang turin SIT din a ni ta a ni. SIT hi IPS officer M.P. Gupta chuan kaihruaiin, commission-ah hian Pratik Dube chu a tel bawk. SIT chhuichianna hian sawisel a hlawh hle a, thil dik lo tia puh officer-te chu chhui mah se mi panga chauh an man a, officer 21 suspend an ni.

Sarma commission report in thil dik lo tia a puhte chu SIT hian an thiam lohna a hmu lo a, an hna pangngai takin an thawh chhunzawm reng avangin SIT report hian rin a hlawh lo hle. SIT chargsheet thehluhah officer ṭhenkhat hmaih an nih avangin sawisel a hlawh hle bawk. SIT chhuichianna hi hleih nei taka kalpui nia an hriat avangin Special Judge Court chuan a hnawl ta a ni. Court hian home department chuan officer ṭhenkhat hum tum angah ngaiin SIT report thehluh hi a hnawl a, chhui ṭha leh turin thupek a chhuah ta a ni.