Hel camp dapchhuak turin sorkar laipui ngen

Meghalaya Chief Minister Dr Mukul Sangma chuan sorkar laipui chu Bangladesh-a Hynniewtrep National Liberation Council (HNLC), United Liberation Front of Asom (ULFA) leh National Democratic Front of Bodoland (NDFB) camp awm mek te chu Bangladesh sorkar hnenah dap chhuak a, nuaibo vek tura ngen turin a phut tih a sawi.

Sangma chuan an state sorkar chuan Bangladesh-a hel pawl hrang hrang te camp nuai bo tur hian a tih theih chu a ti zel dawn tih a sawi a, Bangladesh-a hel awm te hian hmarchhak mai ni lo, India ram hmun hrang hrangah pawi khawihna an thlen ṭhin avangin nuaibo an ngai a ni, a ti.

Bangladesh-a Hynniewtrep National Liberation Council (HNLC), United Liberation Front of Asom (ULFA) leh National Democratic Front of Bodoland (NDFB) te hian vawi tam tak Independence leh Republic day te an lo boycott tawh ṭhin a, buaina an siam chamchi bawk a ni, a ti. State sorkar chuan heng hel te nuaibo tur hian hun rei tak chhung chu beihpui a thlak tawh a, a thlak reng mek bawk a ni. Hel mi leh sa tam tak man an nih tawh bakah eng emaw zat an kap hlum tawh a, ramthuam ṭhahnem tak an man tawh bawk. Mahse hel te hi Banglasesh ramah an inkulh avangin hmalak a harsa tih chief minister chuan a sawi. "Sorkar laipui chu ṭhenawm ram Bangladesh sorkar nen inbiakna nei a, heng hel awmna camp te nauibo tura hma la tur hian kan ngen a ni", tiin Sangma chuan a sawi. Hei bakah hian sorkar laipui chu heng hel pawl hrang hrangte nena inremna nei tura inbiakna nei tura hmalakpui turin an ngen tih a sawi bawk.

HNLC te nena remna kawng zawnga inbiakna nei tur hian ngaihtuahna nasa tak sen a ngai tih Meghalaya Chief Minister Mukul Sangma chuan a sawi a, Congress Legislature Party (CLP) chuan hemi chungchang hi ngun takin a ngaihtuah mek a ni, a ti. Inbiakna neih a nih hma hian HNLC te hian tharum thawhna an bansan a ngai a ni tiin,, ANVC leh GNLA te nen inremna kawng zawnga inbiakna an neih tawh thu leh, state sorkar chuan hel pawl nena inbiakna neih hi a thlawp tawh lo a ni, a ti. Hetih lai hian CLP leh HNLC te chuan thuchhuah siamin MLA te chu Chief Minister thlawp lo turin an ngen tih an sawi. An thupek an zawm lo a nih chuan MPCC office Thana Road a mi chu beih a nih tur thu an chhuah bawk.

Tun hnai khan Meghalaya chief minister chu hel te nena inremna kawng zawnga inbiakna neih duh loh leh mahni hmasial lutuk niin Hynniewtrep National Liberation Council (HNLC) chuan an puh ve thung. Hetih lai hian Sangma chuan inremna thuthlung ziah chu an state tan tun dinhmunah chuan a him tawk lo tih a sawi.