Assam-ah ‘Drug Resistant TB Centres’ hawn a ni

Assam chu hmarchhak state zinga a hmasa ber ni turin ‘miracle’ drug Bedaquiline an tih mai TB damdawi siam chhuak hmasa ber a ni ta a, ‘Drug Resistant TB Centres’ chu hawn nghal a ni bawk.

Assam Director of Health Services Dr R Bhuyan chuan Thawhṭanni khan LGB Chest Hospital, Guwahati-ah TB damdawi Bedaquiline hi a tlangzarh a ni. Dr Bhuyan chuan Bedaquiline hi TB vei, an state chhunga mite hnenah a thlawna pek a nih tur thu a sawi a, Revised National TB Control Programme (RNTCP) hmalaknain kalpui a ni, a ti. TB lan chhuah dan hrang hrangte chu, kar hnih aia rei khuh, rihna hloh, khawsik ser ser leh zan mutnaa thlan tla ṭhin te a ni a ti a, hetianga awm emaw inrinhlehna emaw nei te chu inentir vat tur a ni, a ti bawk.

December 28, 2012 khan US Food and Drug Admi-nistration (FDA) chuan Beda-quiline hi TB damdawi a ni tih a lo pawm tawh a, kum 40 hnuah pawh Bedaquiline hi TB damdawi hmuhchhuah awm chhun a ni.

World Health Organization chuan hriselna kawnga dam-dawi ṭha a thlanchhuah zingah pawh Bedaquiline hi a tel phak a ni. Assam hi ‘Drug Resistant TB Centres’ nei thei state pangana leh centre parukna a ni a, Tamil Nadu, Maharashtra, Gujarat leh New Delhi-ah te centre hi hawn a lo ni tawh bawk.