Bhaichung Bhutia'n electoral politics a chawlhsan

Indian football legend leh Sikkim-a eptu pawl, Sikkim Democratic Front (SDF) hruaitu Bhaichung Bhutia chuan electoral politics a chawlhsan thu Thawhlehni khan a puang.

Bhutia hi kumina Sikkim assembly inthlanah khan SDF ticket-in Barfung assembly bial-ah a ding a, mahse Sikkim Krantikari Morcha (SKM) candidate Riksal D Bhutia a hneh zo lo. He inthlana a chak loh hi politics chawlhsan a tumna chhan pakhat niin a lang. West Bengal leh Sikkim-a hian ṭum li inthlan chuh tawhin, a chak zo lo vek a ni.

Thuchhuah a siamah Bhutia chuan, 'Kum 2024 inthlan result a chhuah hnuah, electoral politics hi ka khelh ve tur a ni lo tih ka hrechiang ta a ni. Hei vang hian electoral politics kaihhnawih zawng zawng ka chawlhsan nghal a ni," a ti. Sports leh tourism lama hmasawnna tur ngaihdan ṭha tak takte a nei a, hengte hi state hmasawnna tura chhawpchhuahna hun nei ve se a chak hle tih a sawi. Hemi rual hian a tan kawng a inhawn tak loh avangin, amah aia state hmasawnna tura ngaihdan ṭha zawk neite an rawn chhuah chhoh zel a beisei thu a sawi.

Bhutia hian kum 2018, May 31 khan political party, Hmaro Sikkim Party a din a, nikum November thla khan an party hian Pawan Chamling kaihhruai, SDF hi an zawm a ni.