NIA Special Court-in UNLF mi 18 te thiam loh chan tir

National Investigation Agency (NIA) Special Court, Guwahati chuan nimin khan United National Liberation Front (UNLF) helpawl mi leh sa man te chungthu a rel a, mi 18 te chu thiam loh a chan tir. An zingah hian UNLF chairman Raj Kumar Meghen pawh telin, Unlawful Activities (Prevention) Act leh Indian Penal Code te tlawhchhanin thiam loh chan tir an ni.

Thiam loh chan tir tak te hi hreawm taka kum sarih aṭang-a kum 10 chhung tang tura tih an ni a, Assam, Manipur leh Idia ram hmun ṭhenkhatah te pawikhawihna thlengah an in-hnamhnawih ngei a ni tih finfiah a ni.

Sorkar do zawng leh mipui pawikhawih zawnga chea puh mi UNLF mi leh sa 25 te chungthu hi NIA Special Court, Guwahati chuan a ngaihtuah a, mi 18 te thiam loh chhantir an nih lai hian midang pasarih te chu an chungthu relfel a nih hma hian an tlan bo a ni. April 30, 2010 khan Guwahati-a an inluahah UNLF vice chairman Khundong Tomba alias Bikramjit, leh Y Nabichand bakah midang te chu man an ni a, an kut
aṭang hian laptop, pen drive pathum, mobile phone pakhat, wireless internet connection leh pawisa fai Rs 50,000 te chu man a ni bawk.

NIA leh Assam Police te chuan hnuchhui hna hi thawk nghalin UNLF mi leh sa 20 chuang an man belh a, thu zawhfiah an ni. An inpuanna aṭanga a lan danin heng mite hian Manipur leh Assam-ah te pawikhawihna thlen tumin hma an la tih an sawi. Heng bakah hian ralthuam tawlhruk, leh India sorkar do zawnga chetna hrang hrangah an inhnamhnawih fo
ṭhin tih an sawi. NIA te chuan hnuchhui an kalpuina lamah hian UNLF chairman Raj Kumar Meghen alias Sanayama chu an man tel bawk a, a kut aṭang hian laptop, mobile phone leh thli dang eng emaw zat an man tel a ni.

National Investigation Agen-cy (NIA) Special Court, Guwahati-in thiam loh a chan tir tak te chu Th Herojit Singh, Sougaijam Rakesh Singh, Oinam Somorjit Singh, Wayenbam Noren Singh, Naba Kumar Singh, Kh Jeeten Singh, Sinam Gune Singh, Mutun Ibohal Singh, KM Chingakham Bambem Chanu, Londhoni Devi, Oinam, Ningombam Dilip Singh, Laurenbam Jatishor Singh, M Joy Singh, N Bomi Singh, Y Brajabidhu Singh leh A Ibomcha Singh te an ni.

Court-in thiam loh a chan tir zinga mi UNLF Chairman RK Meghen hi Manipur hmun hrang hranga pawikhawihna thlengah a hnarkaitu a ni fo a, state sorkar pawhin man tuma a veh zinga mi a ni. RK Meghen hi kum 10 chhung lungin tang tura hremna pek a ni. Meghen hi Sanayaima tia hriat lar a ni bawk a, Imphal-a a chenna chu a chhuahsanin kum 30 chhung zet chu Manipur-in rorelna hran a neih theihnan a bei tawh a ni. Meghen chuan, Manipur chu “Martial Law" hnuaiah a awm tih sawiin, an ram buaina chu democracy hmanga chinfel chu mipuite duh thlanna a ni, a ti. Amah hi kum kum 70 mi a ni tawh a, Manipur lal chhungkaw thlah niin, Kolkata-a Jadavpur University aṭanga International Relations zirchhuak a ni. Kum 2011 khan NIA te chuan Dhaka-ah an man ta a ni. Hetih lai hian UNLF chuan an hruaitu hlun Meghen hi Dhaka-ah Indian intelligence agency leh Research and Analysis Wing (RAW)
ṭangkawp te chuan an man niin an sawi.