Hmasawnna hna thawh vil turin ‘Team Assam’ din

Assam Chief Minister Sarbananda Sonowal hoin Deputy Commissioner te leh Superintendents of Police te chuan Nilaini khan Bongaigaon-ah meeting an nei. He meeting-ah hian Assam chhunga district 16 aṭangin DC, SP leh mi pawimawh dangte an kal khawm a, hmasawnna hnathawh vil turin ‘Team Assam’ din a ni.

He hunah hian hmasawnna hnathawh mekte thlirletna leh sawihhona hun hman a ni a, CM Sarbananda Sonowal chuan hmasawnna hnatawh te vil tur hian ‘Team Assam’ din a nih thu a sawi. ‘Team Assam’ hian hmasawnna hnathawh hrang hrangte an vil dawn a, hmasawnna chu state mipuiten an chan vek theih nan leh rualkhai taka kalpui a nih theih nan an ni hian hma an la dawn a nia ti. Sonowal chuan, mipuite duhna leh beiseina te tih hlawhtlinsak chu a kaihhruai sorkar ngaihpawimawh ber a nih thu sawiin, mipuite chu dawhthei taka lo nghak tur leh hmasawnna hna thawh mek te thlir thiam turin a duh tih a sawi.

Meeting-ah hian National Register of Citizens (NRC) kal-pui mek chu sawiho a ni bawk a, a pawimawhna te tarlangin dik taka kalpui a ṭul thu kal khawm te chuan an sawi a ni. Chief Minister chuan DC leh SP te chu NRC kalpui mekah hian Supreme Court ngenna ngai pawimawh a, a hun takah felfai taka zawh a nih theih nana hma la turin a ngen a ni. NRC chuan ngaihven a hlawh tih sawiin, sorkar tan pawh mualpho theihna a ni a ti a, ram leilung fate chauh ziah luh an nih theih nan fimkhur a ṭul tak zet tih a sawi bawk. NRC hi district 16-ah kalpui mek a ni a, DC leh SP te chuan an huamchhunga NRC kalpui a nih dan report an pe ve bawk a ni.