Manipur Bills ennawn leh tura tih a ni

Manipur-a political party inzawmkhawm, All Political Party Delegation te chuan Thawhlehni khan Union Home Minister Rajnath Singh chu North Block-a a office-ah an hmu a, Manipur Bills chungchangah hmalak pui turin an ngen. Union Home Minister dawr tur hian Manipur Chief Minister Okram Ibobi Singh hoin member 18 an thawk chhuak a ni.

Manipur All Party Delegation leh Union Home Minister Rajnath Singh te chuan heng bill - Protection of Manipur People Bill 2015, The Manipur Land Reforms and Land Revenue (Seventh Amendment) Bill 2015 leh Shops and Establishment (Second Amendment) Bill, 2105-te chu an thlir ho a, Bill hi President pawmpui turin thawn nghal a ni. President chuan heng bill te hi hnawlin, ennawn leha siamṭha turin a ti.

Manipur Assembly-in Bill a pass zinga mi, Protection of Manipur People Bill 2015 chu constitutional expert ten India danpui kalh a ni em tih an ennawn leh dawn a, siam ṭhat ngaite siamṭhat a ni ang. Protection of Manipur People Bill 2015 hi Manipur-a hnam hrang hrangte venhimna atana duan a ni. The Manipur Land Reforms and Land Revenue (Seventh Amendment) Bill 2015 leh Shops and Establishment (Second Amendment) Bill, 2105 te pawh ennawn tura tih a ni bawk. Heng bill te hi ennawna siamṭhat a nih hnuah Union Home Minister chuan Manipur Chief Minister hnenah hriattirna a pe leh dawn a ni. Manipur palaite hian Union Home Minister hnenah hian ngenna thlenin, Manipur Tribal Forum leh police-te inkara buaina chhuak chu chinfelpui turin an ngen a ni. He buaina avang hian mi eng emaw zat chuan hliam an tuar.

Union Minister chuan amah dawrtute hnenah hian bill pathum te chu State Assembly-ah ennawna siamṭha leh tura thu lo rawnin, monsoon session neih hma ngeia peihfel turin a lo hrilh a ni.