Meghalaya sorkar kutah UALA inpe

Hmarchhak-a hel pawl hnawksak tak United A’chik Liberation Army (UALA) mi leh sa 66 zet te chu Ningani khan Meghalaya sorkar kutah an inpe.

Sorkar kuta inpe zingah hian UALA Chairman Novembirth Marak pawh a tel a, West Garo Hills district-a SMELC Building, Tura-ah Chief Minister Mukul Sangma leh Home Minister Roshan Warjri te hmaah an ralthuam te dahin an inpe a ni.

UALA hi kum 2012 khan din a ni a, state sorkar nen inremna zawngin inbiakna neih a ni a, December 18, 2015 khan inremna thuthlung an lo ziak tawh a, kum khat leh a chanve dawn a vei hnuah sorkar kutah hian an inpe ta a ni. General Secretary , Garo Baptist Convention, Rev. Janang R. Sangma, Pastor, Hawakhana Church, Rev. F. D. Sangma leh Rev. Fr. Januarius S. Sangma te chuan hel inpete lo lawmna inkhawm hi an hmanpui a, sorkar mi pawimawh mi eng emaw zat an tel bawk.

Chief Minister Mukul Sangma chuan ni chhinchhiah tlak a nih thu sawiin, sorkar chuan thinlung takin a lo lawm tih a hrilh a, hel pawl ṭhenkhat ramhnuaia la awm te tan pawh sorkar chu a inhawng reng a ni, a ti. UALA Chairman Novem-birth Marak pawh thusawina hun pek a ni a, sorkar laka lungawi lote chuan phuba lakna zawngin remchang an dap mai ṭhin tih sawiin, ralthuam hial lek a ngai ṭhin chu pawi a tih thu a sawi. Sorkar chu an state-a remna leh muanna a awm zel theih nana hma la zel turin a duh tih a sawi a, hmarchhak chu hmun ralmuangah a chang thei a ni,a ti.

CM chuan helte lakah hian sorkar chu a beidawng ngai lo tih sawiin, remna leh muana chu mipuite pawhin an duh ber a ni, a ti.

Home Minister Roshan Warjri pawhin UALA mi leh sa te chu an ralthuam te daha sorkar kuta an inpek tak avangin lawmawm a tih thu a sawi a, an inenkawlchhona leh harsatna awm thei te chu sorkar chuan a ngaihsak zel dawn a ni, a ti. Ralthuam dah mah se, a ai ropui zawk chu rilru inlamleta sorkar an bel ngam chu a ni tih a sawi. "In zinkawng bumboh tak chu in zawh chhuak ta a, ka lawmpui tak zet che u a ni" tiin a lawmpui thu a sawi.

Hynniewtrep National Libe-ration Council (HNLC) Chairman ni ṭhin Julius K.Dor-phang pawh tunah chuan ram roreltu niin Mawhati bial mipuite chuan amahah rinna an nghat tawh a ni tih minister chuan a sawi bawk. Julius K.Dorphang hi thusawina hun pek a ni bawk a, a ni bakah hian sorkar kuta inpe ta UALA Chairman Novembirth Marak chuan amah leh a ṭhianten sorkar kuta inpek duhna an neih chhan te tarlangin, Mukul Sangma kaihhruai state sorkar fakna thu a chhakchhuak ve bawk a ni.