Nagaland sorkar-in zirtirtute vau

Nagaland School Education minister leh SCERT hotu Yitachu chuan zirtirtu, aikal la te chu an hna aṭanga bang ngam turin a duh tih a sawi.

Sorkar chuan zirtirtu aikal la zawng zawng te chu June 30 hma ngeia an hna zawm turin hriattirna a tichhuak a, an hna an zawm lo a nih chuan an hna aṭanga ban thlenga hma lak a nih tur thu a sawi. Yitachu chuan hna nei lo ṭhalai lehkha thiam tam tak an awm tih sawiin, mi pakhatin hna pahnih emaw a aia tam thawh kawp hi a rem lo a, an duh an thlang mai tur a ni, a ti.

Directorate of School Education buatsaihin Kohima-ah ‘Training-cum-conference for physical education teachers on newly printed handbook’ ni thum awh buatsaih a ni a, he hun hi Education Minister hian a hmanpui a ni. Yitachu chuan, education department chuan zirtitu aikal la eng emaw zat an awm tih a hre tawh a, heng mite chungah hian engtin nge hma lak a nih zel dawn chu an la hre mai dawn tih a sawi. Mahni hna thawk peih lo te chu pension anga an chhuah pawh a ngai mai thei niin a sawi bawk.