Manipur-ah '10-day economic blockade' neih mek a ni

Manipur-ah chuan '10-day economic blockade' chu Inrinni zan zanlai aṭang khan neih ṭan a ni a, Manipur huam chhunga Tribal te chenna hmun hrang hranga National Highways te chu dan vek a nih bakah, JAC against Anti-Tribal Bills hmalaknain Tribal Area-a national project hnathawh mek te chu tihtawp vek a ni.

Nawrh huaihawt hi Manipur Legislative Assembly-in August 31, 2015-a a lo pass tawh 'Anti-tribal bills' duhlohna kal zel a ni a, June 19 zan lai thleng kawngpui dan hi kalpui a nih tur thu Joint Action Committee Against Anti-Tribal Bills (JAC) chuan an sawi. Kawngpui pawimawh tak National Highway-2, Imphal-Dimapur inkarah lirthei tlan hmuh tur a awm lo.

Outer Manipur Tribals’ Forum (OMTF),tribal pawl dang - Hmar Inpui, Mizo People Convention, Thadou Inpi, United Naga Council leh Zomi Council te chuan JAC te hmalakna hi an thlawp a ni. Tribal pawl hrang hrangte chuan an dikna leh chanvo te venhim leh humhalh a nih zel theih nana hmalak zel an tum thu an sawi a, state sorkar lakah an lungawi loh thu an sawi. Kangpokpi Town Committee bultumin joint meeting neih a ni a, sumdawngte chu an buangrua leh an thil zawrh te a man truin an ngen a, mipuite hriatthiamna an ngen bawk.

JAC Against Anti-Tribal Bills leh Outer Manipur Tribal Forum (OMTF) te hmalakna-a National Highways dan a nih avang hian Imphal-ah chuan oil man a sang nghal hle a, hmunn hrang hrangah mipuiten harsatna an tawk chho mek a ni. Oil la tur hian zing khaw var ruala intlar an awm ṭan a, stattion eng emaw zat chuan hralh chhuah tur an nei tawh lo bawk. Petrol litre khat man chu Rs 80- Rs 250-ah a kaichho tawh a ni.

Hetih lai hian Manipur Bill hnawl a nih chhanah Joint Committee on Inner Line Permit System (JCILPS) chuan Manipur-a Politicaol Party hrang hrangte chu mawhphurtu niin a sawi. Heng bill chungchangah hian sorkar laipui dawrin political party aiawh te chuan Delhi-a sorkar laipui mipawimawh te an dawr a, mahse bill hi President chuan lo hnawl sakin ennawn leh tura tih a ni. JCILPS te chuan BJP party chetdan chu an dem thu sawiin, heng bill te hi siamṭhat a pass pawh ni se BJP chuan hmingṭhatna a hui dawn a ni an ti a, nakuma inthlan an hmachhawn tura an dinhmun sawhremna atana an ruahmanna a ni, an ti.