Assam CM-in Modi leh Jaitley te a hmu
Assam Chief Minister Sarbananda Sonowal chuan Inrinni khan Prime Minister Narendra Modi hmuin an state sum dinhmun a sawipui.
Sonowal hian Prime Minister hi New Delhi-ah hmuin memorandum a thehlut a, tun hi Assam chief Minister-a lakluh a nih hnua a kawmna hmasaa ber a ni. Darkar chanve vel an inkawm chhung hian Assam CM hian an state sum dinhmun hrilhin, Congress sorkar kal chhuak ta khan leiba vaibelchhe 10,000 chuang a hnutchhiah a ni a ti a, state sum dinhmun a ṭhat chhoh leh theih nan hmalakpui turin a sawm a ni. Sonowal chuan an state sum dinhmun siam ṭha leh tur hian theihtawp an chhuah tur thu sawiin, investment lamah te nasa zawka hmalak a nih tur thu Modi hi a hrilh a ni. Restructuring Systems and Technology for Augmentation of Resources for Transformed Assam (ReSTART Assam) kalpui turin hmalak mek a nih thu Sonowal chuan a tarlang bawk.
CM Sonowal chuan PM hnenah hian infrastructure project heng road, power, IT leh service sector lamah te sorkar
ṭanpuina a ngen. Heng bakah hian crude oil royalty atan sorkar laipui aṭangin cheng vaibelchhe 10,000 pe turin a ngen a ni. Ministry of Water Resources hnuaia Flood Management Programme aṭanga an state sum dawn tur vaibelchhe 1,226 chu pek chhuah thui a nih theih nana hmalakpui turin a ngen bawk. An state revenue deficit grant aṭanga kum 2015-20 chunga an sum hmuh tura beisei chu vaibelchhe 3,379 beisei a nih thu sawiin, hei hi hmarchhak state dang Nagaland, Mizoram, Manipur, Himachal Pradesh bakah Jammu & Kashmir te ai pawha a tlem zawk thu a sawi. 14th Finance Commission hnuaiah hian Prime Minister hi revenue deficit grant atan kum khatah vaibelchhe 5,000 tal ruahman sak turin a ngen a, hmasawnna hnathawh hrang hrangte chak zawka kalpui theih a rin thu leh Vision Document 2016-2025 pawh a hlawhtlin phah ngei a rin thu Prime Minister hi a hrilh a ni.
PM nen inkawm zawh hnuah Sonowal hian Union Finance Minis-ter Arun Jaitley chu a official residence-ah hmu lehin an state hmnasawnna atana thil ṭangkaite a sawipui bakah an state sum harsatna te a thlen leh a, hmalakpui turin a sawm a ni.