AP-ah MLA 14 te disqualify an ni dawn

Arunachal Pradesh Assembly Speaker Wanki Lowang chuan July 16 khian Congress party MLA hel 14 te chu disqualify an nih tur thu a sawi chiang ta.

Speaker kaihhruaina hnuaiah hian Honchun committee din a ni a, Gauhati High Court chuan an report theh luhte chu pawmpui tawhin thla thar khian heng MLA te hi ban an nih thu hi puan a ni dawn ta a ni. He committee-ah hian party hrang pathum ten aiawh an neih ṭheuh a, Honchun Ngandam chu chairman niin, Indian National Congress (INC) aṭangin Pani Taram leh Bharatiya Janata Party (BJP) aṭangin Tage Taki te an tel. Committee hian heng MLA 14 te chungchang hi ngun takin a ngaihtuah a, final report chu Speaker kutah an hlan tawh a ni. MLA disqualify tur zingah hian speaker hlui Nabam Rebia pawh a tel a ni. Congress mi Rajesh Tacho chuan heng MLA te lakah hian nikum khan petition a theh lut a, bawhzui nghal a ni.

MLA te hi June 28 leh 29 thleng insawi fiahna hun pek an ni a, July 2 thleng ziaka insawifiahna hun pek tel an ni bawk. July 16-ah order puan a ni ang a, July 18 khian committee report leh Speaker order te hi Gauhati High Court-ah thawn let leh a ni dawn a ni. MLA 14 disqualify tur te chu Arunachal Pradesh chief minister ni lai Kalikho Pul, Pema Khandu, Kumar Waii, Kameng Dolo, Markio Tado, Jarkar Gamlin, P D Sona, Mutchu Mithi, Kamlung Mossang, Phosum Khimhun, Wanglin Lowangdong, T Wangham, Lombo Tayeng leh T N Thongdok te an ni.