Manipur: Meiten-ten Manipur ṭhenhran duh lo

Meitei civil society organisation intelkhawm, Coordinating Committee of Manipur Integrity (COCOMI) kaihhruaina hnuaiah nimin khan Meiten-ten Imphal-ah kawng an zawh a, Manipur ṭhenhran an duh loh thu an au chhuahpui. Kawngzawh hi THAU Ground aṭanga Khuman Lampak inkarah neih a ni a, Manipur ṭhenhran an duh lohna thuziakte tarlan a ni. Kawngzawhtu zingah hian Meitei MLA pahnih an tel.

Imphal-a kawngzawhtute hian thil phut an neih hrang hrangte an tarlang a, India sorkar chu Manipur ram leilung fate an ral theih nana hmalaah puhin titawp turin an ngen a, sorkar chu mipuite ṭhenhranga awpbeh tumah puh bawkin hei pawh hi sorkar chuan titawp se an duh tih an tarlang a ni. Rampawn aṭang ruihhlo tawlh ru tura rawn lut ṭhinte danchah an nih theih nana hma la turin sorkar chu an ngen a, state chhunga ruihhlo tawlh leh tharum thawhna thleng ṭhin chu tihtawp nise an duh tih an tarlang bawk.

Kawngzawhtute hian Kuki helpawl leh Manipur sorkarin inremna an ziah, Suspension of Operations (SoO) chu tihtawp an duh bakah National Register of Citizens (NRC) kalpui turin chak takin sorkar chuan hmala se an duh tih an sawi. State chhung buaina a reh hma chu an ralthuam laksak lo tur leh an ralthuam dapsak an nih ṭhin chu chawlhsan rih turin sorkar chu an ngen bawk. Kawngzawhtute hian state chhung buaina chu a rang thei ang bera chinfel an duh thu an aupui a, mahse buaina chinfel nana Manipur ṭhenhran chu an duh loh thu an sawi a ni.