Sikkim: Darkar 72 chhungin bailey bridge an dawh zo

Border Roads Organi-sation (BRO), Indian Army leh Sikkim thuneitute ṭangho chuan Dikchu-Sanklang inkalpawh nana pawimawh tak, thir lei (bailey bridge) ft 70 a sei chu darkar 72 hmain an dawh zo hman.

Indian Army, Trishakti Corps a engineer-te kaihhruaina hnuaiah lei dawh hna hi thawh niin June 23, Pathianni khan bul an ṭan a, ruahsur leh khawl lam buaina vangin duh angin hna thawh chak thei lo mah se nithum ral hmain lei dawh hna hi an zo fel hman a ni. Lei an dawh kai hi Dett Khola hmun ami niin, Dikchu leh Sanklang inkara inkalpawhna kawng pawimawh tak a ni a, Mangan district chhunga khuarel chhiatna tawkte ṭanpuina pek luh nana kawng pawimawh tak a ni bawk.

Sikkim forest minister, Pintso Namgyal Lepcha chuan lei dawhna hmun hi tlawhin Indian Army hmalakna hnuaia hna ṭha tak leh rang taka thawh zawh a ni chu lawmawm a tih thu a sawi. Lepcha chuan tuilian vanga an state in harsatna an tawh hnuah nunphung pangngai taka an let leh vat theih nan Indian Army hmalakna chu fakawm a tih thu a sawi bawk.