Gauhati High Court-in khawpui chhunga tui lian ngaihsak loh vangin Assam sorkar a khak

Guwahati khawpui chhunga tuilian chungchanga public interest litigation (PIL) thehluh, Assam sorkar leh a mawhphurtu department in an chhan danah Gauhati High Court chu a lungawi lo hle a, sorkar chuan hma a la ṭha tawk lo niin a tarlang.

Gauhati High Court chief justice Vijay Bishnoi leh justice Kardak Ete ṭhut bench chuan tuilian chungchanga PIL thehluh chu sorkar chuan a chhang lo a, chhanlet theih hun chhung siamsak mah se sorkar chuan a ngaihsak lo a ni, a ti. Court chuan khawpui chhunga tuilian hi buaina liantham tak a ni mah se Assam sorkar chuan a ngaihven tawk lo niin a tarlang. "Khawpui chhunga tuilian vanga harsatna chingfel tur hian a changtu department chuan hma a la ṭha tawk lo a, hemi chungchanga PIL thehluh pawh huntiam chhungin an chhang hman lo a ni" Court chuan a ti.

Assam sorkar hnenah hian Gauhati HC chuan Guwahati chhunga tuilian a tlem theih nana an hmalaknate ni 10 chhunga thehlut turin a lo hriattir tawh a ni. Hemi hun chhunga an chhanna thehlut hman lo department pali chu court chuan a tarlang bawk a, court thu an zawm loh vangin writ petition hmangin chhanna pe turin department te chu thu a pe leh a ni. Hei hi an tihlawhtling lo leh a nih chuan Gauhati High Court legal services authority hnena Rs 1,000 an chawi a ngai dawn tih court chuan a tarlang.