AAP-in Guwahati-ah nawrh an huaihawt

Aam Aadmi Party (AAP) chuan an party hruaitu leh Delhi chief minister ni bawk, Arvind Kejriwal man a nih duh lohna lantir nan Inrinni khan Guwahati, Assam-ah nawrh an huaihawt. Kejriwal man a nih chhan chu politics bawlhhlawh vang a nih thu an tarlang.

Delhi chief minister Arvind Kejriwal hi Enforcement Directorate (ED) leh Central Bureau of Investigation (CBI) chuan Delhi sorkar excise policy kaihhnawih thubuai leh sum inhlanchhawn dana thil dik lo tia puh a nih vangin man a ni. AAP chuan an hotupa man a nih chhan chu thu belhchian dawl lo mai a ni tih an sawi.

Nawrh huaihawtnaah hian APP mi leh sa ṭhahnem tak chu state BJP office, Vajpayee Bhawan, Basistha-ah pung khawmin AAP state convener Dr. Bhaban Choudhury chuan pung khawmte hmaah thu a sawi.

Choudhury chuan an party hotupa chu dik lo taka puh a nih vangin hren mek a nih thu leh, BJP chuan eptu lam ngawih tir nan ED leh CBI a hman ṭangkai ṭhin niin a sawi. "Vawiin hian ramchhung hmun hrang hrangah nawrh kan huaihawt a ni," Choudhury chuan a ti. AAP mi leh sate chuan Kejriwal chhuah zalen tura an duh thu aupuiin Modi sorkarin hleih nei taka ro a rel chu tawp se an duh thu an sawi bawk. Mipui pung khawm hi an ṭhahnem hle a, police lamin mipui hnawh darh tum mah se awmzia a awm lo a ni.

AAP hruaitu hlun Anurupa Dekarjai chuan thla thum chhung zet AAP national convener Kejriwal chu dik lo taka tan tir a nih tawh thu a sawi a, Delhi-a Rouse Avenue Court chuan Kejriwal puh a nihna, dik lo taka sum inhlanchhawng chungchangah finfiahna mumal a awm loh avangin bail a phalsak thu a sawi. Hemi hnu hian ED chuan court sang zawkah appeal in, Kejriwal bail phalna pawh tihtawp lailawk a ni leh tiin Dekarjai chuan a sawi. CBI chu inphiar rukna lam hawi thei zawngin an che a, Kejriwal chu an man leh a ni tiin a eiru a ni tih finfiahna awm lo mah se ED leh CBI chuan BJP duhdanin mi dik leh mipuite duh rawn an hruaitu, Kejriwal chu an man a tih a sawi. "BJP hruaitu thil dik lo taka ti ṭhinte man an nih loh laiin Kejriwal chu phiar ruka man a ni thung a, hei vang hian nawrh kan huaihawt a, chhuah zalen thuai kan duh a ni" a ti bawk.