Manipur : Kuki-ten police thuneihna ṭhenhran dan tihdanglam duh

Manipur chhunga Meitei leh Kuki-Zo hnamte inkara buaina chinfelna a nih theih nan Kuki Hills administration, Kangpokpi District chuan union home minister Amit Shah hnenah ngenna an thehlut. Ngenna an thlen zingah hian police thuneihna chin ṭhenhran dan tihdanglam leh hming thlak an duh tih an tarlang tel a ni.

Kuki hotuten ngenna an siam chhan hi Imphal lama thuneituten police thuneihna chin a ruka an siam danglam ṭhin vang a ni. Imphal East, Imphal West, Thoubal, leh Bishnupur District huamchhung chu zauh niin Kangpokpi-a tribal khaw hrang hrang chu heng district huamchhungah hian rin luh a ni. Manipur home department in hetiang hian kum 2011 aṭang khan hma an la ṭan a, Kuki hnamte chuan hei hi an hrethiam lo hle niin an tarlang. Hetianga chetna hian Meitei tamna district-a Kuki tlemte awmte chu rahbeh nia an inhriatna a tuh tih tarlan a ni bawk.

Manipur a buai hnu khan Meitei tamna district-a Kuki chengte chuan an tuar na hle a, mi 41,425 chuangin in leh lo an chhuahsan bakah mi 186 an thi bawk a ni. Hetiang thil a thlen chhan hi district thuneituten venhimna an kalpui ṭhat tawk loh vang niin, district thuneitute hian India danpui Article 371 C a inziak, tribal dikna leh zalenna humhimsak tura tih chu an zawm ṭha tawk lo tia tarlan a ni bawk. Amit Shah hnena Kuki hruaituten petition an thehluhah hian Hill district thuneihna hnuaia awm ṭhin valley district a dah ni ta - Leitanpokpi, Yainganpokpi, Maphou, leh Keithelmanbi te chu tarlan niin heng thil hi siamṭha turin Amit Shah chu an ngen a ni.