Nagaland : ULB inthlanah NDPP-in seat 153 an la

Nagaland Urban Local Bodies (ULB)- Municipal council leh Town council inthlan result chu puan niin Nationalist Democratic Progressive Party (NDPP) an che ṭha hle a, seat 278 awm aṭangin seat 153-ah hnehna an chang.

Nagaland a ULB inthlan hi kum 20 hnua neih leh niin June 26 ah khan vote thlak a ni. Municipal council pathum- Kohima, Dimapur, leh Mokokchung bakah town council 23 atan inthlan hi neih a ni. Vote hi a tla ṭha hle a 81.66% a tla. Kar liam ta Inrinni khan vote hi chhiar niin party hrang hrang zingah NDPP chu an che ṭha hle a municipal council awmna pathumah hnehna an chan vek bakah town council 21 awm aṭangin 15-ah hnehna an chang bawk. NDPP hian Bhandari, Niuland, Phek, Pfutsero, leh Chozouba-ahte hnehna an chang zo lo a, Mangkolemba-ah independent a dingte nen an seat lak zat a inang bawk.

ULB inthlanah hian hmeichhe candidate 102 awm aṭangin 64 thlantlin an ni. State Election Commissioner T. John Longkumer chuan hmeichhe candidate an tam ber ṭum a nih thu sawiin heng zinga pariat chuan hmeichhe tana hauh seat ni lo aṭangin an tling tih a sawi. Hemichhe tan hian 33% hauh a ni a, hei hi Nagaland-a a ṭum khatna a ni bawk.

Municipal council leh Town council atana inthlan hi Nagaland khawchhak lama district parukah chuan neih a ni lo thung, hei hi Eastern Nagaland People’s Organisation (ENPO) in inthlan boycott tura an ngenna vanga candidate-te an inhnuhdawh vang leh inthlan chuh tum an awm mumal loh vang a ni.