Meghalaya-in thla thum chhung Kar khat zel entry point khar dawn

Meghalaya sorkar chuan  thla thum, September - December chhungin thla tin kar khat chhung chu an state luhna, entry point khar zel a ni dawn tih a puang. 

Sorkar chuan entry point khar a nihna chhan chu coronavirus kai an pun belh zel avanga frontline worker-te hah lutuk tur tihziaawmna atana tih a nih thu a sawi. State chhunga lutte hi hri an kai leh kai loh enfiah sak zel an ni. 

Chief minister Conrad Sangma chuan entry point khar ṭhin a nih tur thu hi sawiin, thla tin chawlhkar hmasa berah khar ziah a ni ang. State khawpui, Shillong-ah hri leng hi mipuiah a darh hlauhthawnna a awm tawh a, hei vang chuan khawpui chhungah random test neih tumin hma a la a, hmun lun zual lai Police Bazar leh Motphran-ahte random testing centre hi a siam a ni. Heng hmunah hian mahni duhthua in test tir tur a ni a, mi eng emaw zat test an ni tawh a, rapid antigen test neih sak an ni. 

Meghalaya-a hian Ningani khan ni khata hri kai hmuh chhuah thar tam ni ber a thleng leh a, mi 126 in hri an kai tih hriat belh leh niin hri kai hmuh tawh hi 1,661 an awm tawh. Hri kai hmuh thar zingah hian Ganesh Das Government Hospital-a thawk doctor pakhat leh nurse pali an tel a, random test neih aṭangin mi 41 in hri an kai tih hriat a ni bawk.