Kuki-Zo leh Meitei te hi an cheng ho thei lo : ITLF

Indigenous Tribal Leaders Forum (ITLF) chuan Manipur khawpui, Imphal-a Meitei-ten kawng an zawh chu an dem tih sawiin, Kuki-Zo hnamte thil phut dodal nana chauha kawngzawh huaihawtah an puh a ni.

Meitei pawl intelkhawm, Coordinating Committee on Manipur Integrity (COCOMI) kaihhruaina hnuaiah kar liam ta Zirtawpni khan Imphal-ah kawngzawh hi huaihawt niin, Meitei-te chuan Manipur ṭhenhran an duh loh thu an aupui a ni.

ITLF chuan COCOMI huaihawt kawngzawhah chuan Kuki-te lakah au hla mawi lo tak an chham thu leh, a cho chhuak zawngin kawngzawhtute chu an au niin an sawi. Heng a nih avang hian Kuki-Zo hnam leh Meitei te chu an cheng ho thei lo a ni, an ti. "Buaina chin fel dan awmchhun chu inṭhenhran a ni, Manipur-a remna a awm theih nan sorkar laipui chuan a ṭhenhran a ngai a ni," ITLF chuan a ti. Kuki-Zo hnam tan India danpui-a Article 239A hnuaiah Union Territory (UT) legislature awm telna pek an duh tih an tarlang nawn leh bawk.