Arunachal : Ruah sur nasa vangin lui lian a tam
Arunachal Pradesh-ah ni nga chhung ruah nasa taka a sur vangin Namsai district leh Wakro circle, Lohit district-a lui zawng zawngte chim chin chuan a hlauhawm chin a pel tawh a, hemi bakah hian hmun hrang hrangah leimin a thleng bawk.
Namsai district leh Lohit district-a Wakro circle-ah Kamlang lui, Tengapani lui, Jengthu lui leh Noa-Dehing luite chu an chim chin a sang tawh hle a ni. Water Resources Division official, C J Mannou chuan nimin khan mipuite chu hmun hrang hrangah lui lian a awm vangin fimkhur turin a chah. Heng district pahniha lui lian hian khaw 34-ah nunphung a tikhaihlak mek a ni. Mannou chuan Namsai leh Lohit deputy commissioner te chu inkhuahkhirhna khauh zawk siam turin a ngen a, khaw mite tan lui lam kal phal lohna thupek chhuah turin a ngen bawk.
China ramiri bula district pakhat, Kurung Kumey chu tui lian vangin tlawhpawh theih lohin a awm mek. Kurung lui lian avang hian district chhung hmun pawimawh Porsiparlo, Damin, Pania Sang, Sarli leh Polosang te chu tlawhpawh theih an ni lo. Kurung Kumey district khawpui Koloriang tlawh tuma kal, MLA Pani Taram pawh tui lian vang hian a tang ve a ni. Lower Dibang Valley district-ah pawh lui lianin chenna-in a la a, mi 50,000 chuang zet tui lian hian a nghawng nia tarlan a ni bawk.
Leimin vanga kawng ping a tam
Ruah sur nasa hian lui lian chauh ni loin hmun hrang hrangah leimin a thlen bawk. National Highways and Infrastructure Development Corporation Limited (NHIDCL) chuan hriattirna chhuahin district pahnih - Lohit (NH-13) leh Anjaw (NH-113) ah te leimin a awm vangin khualzinte fimkhur tura chahin, heng kawng helna tur an hria a nih chuan kal zawk turin mipuite chu an chah a ni.
Bana, Arunachal Pradesh-ah leimin vangin Chepa Road zawhtu lirthei tam tak an tangkang bawk. Lung a tlak belh reng avangin khualzin tan a him lo hle a ni. Indo-Tibetan Border Police (ITBP) te chuan Tatu bula leimin atangin mi pahnih kar liam ta Inrinni khan an chhanchhuak bawk. Hemi ni vek hian Itanagar-ah leimin in school bus a chilh a, mahse thi leh hliam erawh an awm lo thung.