Covid-19 : Assam-ah hripui vanga thi mi 221 awm tawh

Assam-ah Covid-19 kai mi pariat chu Ningani khan an thih belh leh a, he hripui vanga thi hi mi 221 an tling tawh a ni. 

Ningani khan hri kai hmuh chhuah belh mi 1,735 awm lehin, hri kai hmuh tawh hi 86,052 an ni tawh. An zinga 60,348 chu enkawl dam ni tawhin hri kai mek hi 25,480 an awm. Health minister Himanta Biswa Sarma chuan sample 34,376 test aṭangin positive 1,735 hmuh an nih thu hi a sawi a, an zinga 389 chu Kamrup Metro huam chhunga mi niin, Cachar district-ah 175, Diburgarh-ah 116 leh Barpeta-ah 112 an awm thu a sawi. 

Manipur-ah hri kai hmuh thar 49 awm lehin, an zinga pakua chu Central Armed Police Force (CAPF) mi an ni. State chhunga hri kai hmuh tawh hi 4,925 an ni tawh. 

Covid-19 Common Control Room-in thu­chhuah a siamah, hri kai hmuh thar zinga 40 hi hmun danga zin chhuahna nei lo, tualchhung mi an nih thu a sawi. Covid Care Centre-ah enkawl tura dah luh nghal an ni, a ti. Ningania hri kai hmuh thar zingah hian footballer, India 2017 FIFA U-17 World Cup team member, Boris Thangjam pawh a tel tih official-te chuan an tarlang a, local TV network-a thawk pakhat pawh a tel bawk. 

Manipur-ah hian hripui vanga thi hi mi 18 an awm tawh a, enkawl dam 3,002 an awm tawh bawk. Recovery rate hi 60.95% a ni. 

Sikkim-ah Covid-19 kai mi 58  hmuh belh leh niin, an state-a hri kai hmuh tawh hi mi 1,290 an ni tawh a ni. 

Director General (DG)-cum-Secretary, Health, Dr. Pempa T Bhutia chuan hri kai hmuh tharte hi East Sikkim mi vek an ni tih sawiin, an state-a hri kai zinga 827 enkawl dam ni tawhin, hri kai mek hi 460 an la awm thu a sawi bawk. Hripui thihpui hi mi pathum an awm tawh a ni. 

Nagaland-ah coronavirus kai hmuh belh zel an ni a, Ningani khan  hri kai mi 25 hmuh belh lehin anni nen hian hri kai hmuh tawh hi 3,583 an tling tawh. 

Hri kai hmuh tawh zinga 1,921 chu enkawl dam ni tawhin 1,648 enkawl mek an la ni a, mi pariatin an thihpui tawh a, mi dang paruk chu state danga inenkawl turin an haw. Hri kai zingah 1,824 chu taksa lama lanchhuahna nei lo, asymptomatic an ni a, mi 22 chu mild case niin mi pahnih chu an dinhmun a ṭha vak lo nia sawi a ni. State chhung hri kai hmuh tawh zingah hian Armed Forces mi leh sa 1,567 an tel a ni. 

RT-PCR hmangin sample 33,504 test a ni tawh a, TrueNat khawl hmangin sample 21,497 test a ni tawh bawk.