Tripura : Zirlai tlemna sikul a bul hnai sikul nen chhunfin dawn

Tripura chief minister Manik Saha chuan zirlai tlemna sikul 165 vel chu a bul hnai sikul dang nen chhunfin a ni dawn tih a sawi. Tripura education department chuan zirlai tlemna sikul hre tur hian zirchianna an kalpui tawh a ni.

Chief Minister chuan sorkar enkawl sikul ṭhenkhat chhunfin tumna hi zirlai leh zirtirtute tana ṭha lo tur ang zawnga sawiin awmzia a nei dawn lo tih a sawi. Politics nena kaihkawpa hmingṭhatna atana hman duh vangin state chhungah sikul a pung chak hle tih sawiin, zirna ṭha zawk nei tur chuan zirlai tlemna sikul chu zirlai tamna sikul nen chhunfin a ngai a ni, a ti. Zirlai tlemna sikul hi state chhungah 165 vel an awm tih sawiin, heng sikulte hi a bul hnai sikul nen chhunfin an ni dawn tih a sawi a, a theih a nih chuan km 1 huamchhunga mi ni thei se an duh tih a sawi bawk.

"Sikul ṭhenkhat chuan naupang pali chauh nei mah se zirtirtu pathum emaw pali emaw awmna a awm tih hriat a ni, hetiang a nih avang hian zirlaite chuan sikul chhunfin chu an hlawkpui dawn a ni," Saha chuan a ti. Hemi bakah hian zirtirtu indaih loh vanga harsatna an tawh chu tam tak a sukiang thei dawn bawk niin a sawi.

Tripura CM hian Agartala a traffic jam a ziaawm theih nan sorkar chuan hma an la mek niin a sawi bawk a, kawng chhawng siam belh chuan kawng tawt lutuk a tihziaawm theih an beisei thu sawiin hemi tur hian hma lak an tum tih a sawi bawk.