Rel kawng thenfai hna thawk mek

Railway Authority chuan hun rei tak chhung ruahsur, lei min leh tuilian avanga hmarchhak hmun ṭhenkhata rel service tihtawp lailawk chu dan pangngaia tlan tir leh turin an peih fel dawn hnai tih an sawi. Tripura, Mizoram, Manipur kawthlang lam leh Assam chhim lamahte hian thla khat chuang rel service tihtawp a ni tawh a ni.

Tripura Bharatiya Janata Party President Biplab Deb chuan Zirtawpni khan an harsatna tawh mek chu sutkian a nih theih nan Assam Public Works Department (Roads and Highways) Minister Parimal Shuklabaidya nen hma lak dan tur te an sawi dun tih a sawi. Tripura chu rel service a mumal loh avang hian a tuar nasa ber pawl an nih thu Biplab Deb chuan sawiin, railway line leh national highways Tripura, Mizoram leh Manipur khawthlang lam panna te hi siamṭhat leh thuai a nih a beisei thu a sawi. Hengte hi bungrua leh ei tur lakluhna kawngpui pawimawh a nih avangin mipuiten harsatna an tawk mek a ni, a ti.

National Highway 8 hian Tripura state chhungah hian km 585 zeta thui a paltlang a, he kawngpui kaltlang theih loha a awm mek avang hian oil tankers, bungraw phur trucks leh lirthei ṭhahnem tak chu Lower Powa area, Southern Assam-ah an tangkhang mek tih a sawi bawk. April 27-a hmarchhak hmun hrang hranga thlipui leh ruahpui nasa tak avang khan rel service te chu tihtawp lailawk a ni a, May 6-ah thenfai hna zawh niin dan pangngaia tlan tir leh an ni a, mahse ruahsur, leimin, thing tlu leh thil dang avang tein May 13 khan tihtawp lailawk leh a ni.