Protection of Manipur Peoples’ Bill 2015 Siamṭha dawn

Manipur all political party aiawh leh Union Home Minister Rajnath Singh te chuan Thawhlehni khan meeting an nei a, President-in a hnawlsak The Protection of Manipur Peoples’ Bill 2015 siam ṭhat dan an rel. He bill hian India danpui a kalh nia hriat a nih avangin President chuan a lo hnawl sak tawh a ni.

The Protection of Manipur Peoples’ Bill 2015 hi legal and constitutional expert te chuan an zirchiang leh dawn a, Manipur Assembly-ah ngaihtuah
ṭhat leh tura tih a ni bawk. Hei bakah hian Manipur Land Reforms and Land Revenue (7th Amendment) Bill, 2015 leh Manipur Shops and Establishment (2nd Amendment) Bill, 2015 te pawh ennawn leh tura tih a ni a, Parliament Monsoon Session neih hunah heng Bill te hi Parliament chuan a ngaihtuah dawn a ni.

Manipur-a pawl hrang hrang te chuan bill pathum te hi an dodal a, phaizawl leh tlang mite ṭhenhran tumna a ni, an ti. Hetih lai vek hian pawl ṭhenkhat chuan bill te hi hman a nih thuai theih nan kawng hrang hrangin state sorkar leh sorkar laipui chu an nawr ve reng bawk. Manipur Bill hnawl a nih chhanah Joint Committee on Inner Line Permit System (JCILPS) chuan Manipur-a Political Party hrang hrangte chu mawhphurtu an ni, an ti ve bawk.