Assam : Tuilianin district 14 a nghawng; thi 32 an awm tawh

Assam chuan tuilian vangin harsatna a tawh chhunzawm zel a, district 14 a nghawng tawh nia tarlan a ni. Assam hian chawhrualin ni khata ruah 21.6 mm dawng anga chhut a ni a, hei vang hian hmun hrang hrangah tuilian vang hian harsatna tawkin state mipui 2,70,628 in a nghawng an tuar mek.

Tuilian vang hian khaw 698 ah nunphung a khaihlak a, hmun hrang hrangah lui lian- Brahmaputra (Dibrugarh), Nimatighat (Jorhat & Tezpur), Subansiri (Badatighat, Lakhimpur), Dikhow (Sivasagar), Dichang (Nanglamuraghat, Sivasagar) leh Beki (Barpeta Road Bridge) a awm bawk. Thawhṭanni khan Dhemaji district-ah tuilian vangin naupang pahnihin nunna an chan a ni.

Tuilian leh ruah sur nasa vangin Haflong leh Silchar inkar kawng, National Highway 27 chu Thawhṭanni khan khar a ni a, thuneitute chuan thu leh awm hma chu he kawng hi khar a ni rih dawn tih an tarlang. Dima Hasao district-ah ruah sur a tam vangin Jatinga lui chu a lian a, Jatinga leh Haflong inkara kawngpui pawimawh tak a chim pil a, he kawng zawhtu lirtheite chu kawng lakah an tangkhang a ni. Kaziranga National Park and Tiger Reserve (KNPTR) pawn tuilian vang hian harsatna an tawk ve bawk. Park chhunga forest camp 95 chu tuilian hian a chim tawh a, hemi bakah hian camp paruk aṭangin hmunhim lamah inthiarchhuah a ngai bawk.

Brahmaputra luia thliarkar pakhata tang, sangha mantu 13 te chu Indian Air Force (IAF) helicopter chuan nimin zing khan an chhanchhuak. Heng sangha mantute hi ni thum zet thliarkarah hian an tang tawh a, chhanchhuaktu pawlte chuan lui tui lian vangin an tlawhpawh ngam lo a, IAF hian helicopter hmangin an chhanchhuak ta a ni. Tinsukia distric-ah chuan lui lian danna tura an siam chu ruah sur nasa vangin a chhia a, khaw 30 chuang dinhmun hlauhawm takah an ding mek nia tarlan a ni.

Union minister Sarbananda Sonowal leh Assam chief minister Himanta Biswa Sarma chuan state chhung tuilian chungchanga hma lak dan turte an sawi dun a, Sonowal chuan tuilian tuarte chhawmdawl hna chak taka thawk turin Assam CM chu a ngen. Hemi bakah hian tuilian nghawng a ziaawm theih nan tihtur ṭulte ti turin Himanta chu a chah bawk. Himanta chuan tuilian vanga harsatna tawkte nitin mamawh chu a rang thei ang bera pek chhuah a tum thu a sawi ve bawk. India Prime Minister Narendra Modi pawhin Assam chu ṭanpui an ngaihna lai apiangah an pui dawn tih a sawi.

State pumah tuilian vanga thi mi 34 an awm tawh nia tarlan a ni. Indian Meteorological Department (IMD) chuan Assam leh Meghalaya-ah ruah sur a la tam dawn niin a tarlang a, state pahnih tan hian Red Alert a tichhuak a ni. Hemi a nih avang hian tuilian hian ziaawm lam a la pan mai a rinawm lo a, lui hrang hrang chim chin pawh a san belh zel rin a ni bawk.