PM-in Manipur chungchang a sawi hunah ka ngawi ang : Manipur MP

Manipur Member of Parliament Dr Angomcha Bimol Akoijam chuan Thawhṭannia parliament-a motion of thanks sawinaah, Manipur buaina chungchanga prime minister Narendra Modi a ngawi reng leh President thusawia hmaih a nih chungchang a sawi chhuak.

MP Akoijam chuan Manipur buaina chungchanga ngawih an chuh tlat chu thil pangngai a ni lo tih sawiin, British-in India a awplaia thil thleng leh tuna Manipur chungchanga India hma lak dan chu danglamna a awm lo tih a sawi. State chhung buaina vangin mi 60,000 chuang chenna nei loin an awm mek a, mi 200 chuangin nunna an chan tawh tih a tarlang bawk. State chhungah indona a thleng mek a, mipuite chuan an khaw venghim turin ralthuam an chelek a ngai a, mahse heng thil thleng zawng zawng hi India sorkar chuan ngawi rengin a thlir ringawt a ni, Akoijam chuan a ti.

Manipur chhungah central armed forces hmun tinah dahluh ni tawh mah se mipui nunna leh bungruate chu an venghim zo lo niin Inner Manipur MP chuan an sawi. "Mi 60,000 aia tam chenna tur nei loin an awm mek a, in 1,000 chuang tihchhiat a ni tawh chung hian Prime Minister chu a ngawi reng thei a, President thusawiah pawh tarlan a ni lo" a ti. Nationalist party tia inchhalin Manipur hi India ramchhung ani tia an sawi hunah leh, PM Modi-an state buaina chungchang a sawi hunah ka ngawi chauh ang, tiin a sawi bawk.