Sorkar chak, langtlang neih nan digitisation kan kalpui : Tripura CM

Tripura chief minister Dr. Manik Saha chuan sorkar langtlang, hnathawk ṭha leh mawhphurhna la ngam sorkar an neih theih nan sorkar inrelbawlnaah digital hmanga thil tam zawk ti thei turin state sorkar chuan hma a la tih a sawi.

Chief Minister hian nimin khan state secretariat-ah e-Panchayat a tlangzarh a, India ram pumin an hmalakna chu entawn se a duh tih a tarlang. He hunah hian CM chuan e-Office 100% a nei tawh department-te hnenah lawmpuina a hlan bawk. Saha chuan digitisation an kalpui chu mipuiten langtlang sorkar an neih theih nan a ṭangkai dawn niin a tarlang.

Saha chuan e-Cabinet system chu peih fel a ni tawh tih sawiin, hemi hmang hian chak zawka hnathawh niin buaina pawh rang zawkin kan ching fel thei dawn a ni, a ti. Tunah hian Gram Panchayat 587, Village Council Office 589, District Panchayat Office pali, PRTI pali, Panchayat Samitis 35, Block Advisory Committee 40, leh District Council pariat te chuan e-Office system hi an hmang mek a, department hrang hrang- Information and Cultural Affairs, Education leh Urban Development department te nen thlunzawm niin chak zawk leh langtlang zawka hnathawh theih beisei a ni.