Nagaland : Ruah sur nasa vangin chhiatna thleng a tam

Nagaland State Disaster Management Authority (NSDMA) chuan state chhung hmun tam takah ruah sur nasa vangin chhiatna an tawh thu a sawi. Ruah sur nasa vang hian leimin, kawng ping, lei (bridge) chhia, leilet chim pil leh mihring nunna chan an awm nia tarlan a ni.

Nagaland-ah ni nga chhungin tui tla panga an awm tih NSDMA chuan Nilaini khan a tarlang. Kejok khua, Tuensang district-ah June 28 khan mipa naupang pahnih chu tuilianin a la a, ruang pakhat hmuh tawh niin ruang pakhat erawh nimin thleng zawn ni mah se an hmuh zawh mai loh vangin a chhungte remtihnain a ruang zawn hi tawpsan a ni. Hemi bakah hian Nsonji dil, Tseminyu district-ah tla an awm bawk a, a ruang hi zawn hmuh a ni tawh. Dzuvuru leh Nguhaiu-ah tui tla hi an awm bawk tih tarlan a ni.

Lui lian bakah ruah sur nasa vangin hmun hrang hrangah leimin a awm a, heng avang hian kawng ping a tam hle. Kiphire district-ah chuan chhungkaw tam tak thiar chhuah an ngai a, Penkim leh Fakim chu chirh tawlhin kawng a hnawh vangin an tlawhpawh theih loh bawk. Thanamir pannaah leimin tam tak a awm vangin kalpawh theih a ni rih lo. Chingmei leh Noklak inkarah kawng chhia a awm bakah tuiin kawngpui ṭhenkhat a chim pil nia tarlan a ni bawk. Zunheboto district-ah leimin in chenna in tam tak a hnawl bawk a ni.

Khuarel chhiatna hrang hrang vangin Nagaland chhungah hian nunphung a khaihlak hle a, NSDMA chuan bungraw tihchhiat hlut zawng hi an la chhut mek a ni. District Disaster Management Authorities leh line department te chu inralring reng turin NSDMA chuan a chah a, mipuite pawh lui a len zel avangin sangha mana kal chhuak lo tur leh, lui lama kal tam lo turin an chah.