Assam : Sonowal-a'n Dibrugarh-a tuilian tuarte a tlawh

Union Minister of Ports, Shipping & Waterways, Sarbananda Sonowal chuan Dibrugarh, Assam a tuilian tuarte a tlawh a, chhawmdawlna hnathawh dan a hmunah a enfiah nghal a ni.

Sonowal hian Dibrugarh khawpuia tui lenna hmun Graham Bazaar, AT Road, HS Road, RKB Path, Mancotta Road, Thana Chariali leh Jhalukpara te a tlawh bakah tulian danna an siamna hmun, Tengakhat leh Hatibandha a tlawh bawk. Heng bakah hian tuilian vanga an chenna hmun chhuahsantute awmna, Tengakhat-a chhawmdawlna-in chu Nilaini khan a tlawh bawk.

District comissioner chu chhawmdawlna-inah faina vawng tura hriattirin hri a len loh nana hmala tur leh damdawi lama enkawlna pe turin Sonowal chuan a hriattir. Chhawmdawlna-ina awm zinga tar, hmeichhia leh naupangte chu ngaihven lehzual turin DC chu a chah bawk a ni.

Union Minister hian tuilian tuarte ṭanpui hna chu state sorkar leh sorkar laipui chuan a thawk reng tih sawiin, zángnadawmna pawh an pe ngei dawn tih a tiam. Thuneitute chu tuilian danna a rang lama siamṭha tur leh siam belh turin a hrilh tih a sawi.

Assam pumah hian tuilian vang hian Nilaini thleng khan mi 46 in nunna an chan tawh a, state chhung district 29 a mipui nuai 16.25 chu tuilian hian a nghawng mek niin Assam State Disaster Management Authority (ASDMA) chuan a tarlang. Dhubri district chu a tuar na ber niin tuilian hian mi nuai 2.2 nunphung a tikhaihlak mek a ni. Tuilian hian in leh lo a tihchhiat bakah kawng, lei (bridge) leh tuilian danna hmun tam takah a tichhe tawh bawk.