Sikkim : QR code hmanga taxi fare dawng theih turin hriattir

Sikkim transport department chuan state chhunga taxi khalhtute tan QR code an hman ngei a ngai tiin thuchhuah a siam. Hetiang an tih chhan hi taxi hmangtute tana awlsam zawk nan leh chuan man dik lo taka khawn a hluar loh nan a ni.

Transport department hian taxi fare dik lo taka lak ṭhin chungchangah mipui hnen aṭangin complaint an dawng tam hle a, heng avang hian QR code emaw UPI online payment hmanga fare dawng thei turin Sikkim chhunga taxi khalhtute tan thuchhuah an siam a ni. Fare chungchanga buaina mai bakah pawisa inhlan avanga traffic jam a ziaawm theih an beisei bawk. He thutlukna hi Sikkim chhunga taxi association leh mipui aiawhte inbiakna neih hnua siam niin QR code hi online-a pawisa pek theihna platform lar Google pay, Paytm leh PhonePe ami a hman theih ang.

Sikkim chhunga taxi khalhtute chuan he thuchhuah hi July 15, 2024 hmain an zawm vek tur a ni a, QR code chu passenger-te hma zawn darthlalangah leh a hnunga ṭhute hmuh theih turin an taxi-ah chuan an bel tur a ni. Hemi bakah hian taxi fare inziahna chu a hmangtute hmuh theih turin langsar taka dah lang tura hriattir an ni bawk. Sikkim transport department chuan hetiang hmalakna hi pawisa inpek kawnga buaina a tam loh nan leh, taxi hmangtute tana a awlsam zawk nan leh taxi fare chungchanga inhnial buaina a thlen tam loh nana ti an nih thu an tarlang.