Tripura-ah Covid-19 vanga thi tam ber ni thleng

Tripura-ah Thawhṭanni khan Covid-19 vangin mi 10 an thih belh leh a, ni khata he hri vanga thi an tam ber ni a thleng. Hripui vanga thi hi mi 112 an awm tawh. 

Thawhṭannia hripui vanga thi zingah hian hmeichhe advocate lar, Padma Datta­gupta pawh a tel. Kum 55 mi, Dattagupta hi hri a kai tih hriat chhuah a nih tuk lawkah thawk lama harsatna a neih avangin a thi a ni. 

Kum eng emaw zat chu Tripura State Committee of the All India Lawyers Union co-president a ni tawh a, Women’s Commission leh Child Right’s Protection Commission-ah  member a lo ni tawh bawk. 

State pumah hri kai hmuh chhuah thar mi 321 awm lehin, hri kai  hmuh tawh hi 11,647 an tling tawh. An zinga 7,654 chu enkawl dam ni tawhin, enkawl mek 3,858 an awm. 

Sample 2,71,876 test a ni tawh a, mi maktaduai khatah 68,010 test ang an ni. Test aṭanga positive hmuh chhuah, positive rate hi 4.28% niin, hri kai dam tawh recovery rate 65.83% a ni a, thihpui rate hi 0.90% a ni. 

Sikkim-ah pawh  hri vanga thi pali an awm tawh. 

Thawhṭanni khan kum 50 mi, Covid-19 kai Sir Thutob Namgyal Memorial (STNM) Hospital-a enkawl mek chu a thi a ni. 

Sikkim-ah hian hri kai hmuh thar 25 awm lehin, an state-a hri kai hmuh tawh hi 1,653 an tling tawh. An zinga 1,225 chu enkawl dam ni tawhin, enkawl mek 424 an la awm a ni. 

Thawhṭanni thleng khan sample, 41,069 an test tawh.