Ramri hung leh FMR tihtawp hi Meitei tih lawm tumna a ni : KIM & KCA

Kuki Inpi Manipur (KIM) leh Kuki Chiefs Association (KCA) Manipur chuan sorkar laipuiin India leh Myanmar ramri hung a tumna leh, Free Movement Regime (FMR) tihtawp a tum chhan chu Meitei hnam tih lawm a tum vang niin an tarlang.

Kuki pawl lian pahnihte hi ramri hung tumna hian a tilunghnur hle a, an duh loh thu an aupui bakah kawngzawh pawh huaihawt mah se awmzia a awm lo a, sorkar chuan ramri hung hna hi chak takin a kalpui mek zawk a ni. Sorkar laipui hian an remruatna a hlawhtlin theih nan central force chu hna thawk veng turin an dah niin Kuki pawlte chuan an sawi a, hnam tenau zawkte dinhmun ngaihtuah loah sokar chu an puh.

KIM leh KCA chuan thuchhuah inṭawm siamin,"Ramri hung hi Manipur-a Kuki hnam chengte nunphung leh chin dan nghawng thei thil pawi tak a ni" an ti a, ramri hungna vangin inkalpawh a harsa tawh dawn a, chumi chuan hnam inpumkhatna a tichhe thei niin an sawi. BJP sorkar in Act East Policy hlawhtlin theihna kawng khat atana kum 2018 aṭanga a nih dan tur pangngaia hman ṭan, FMR a tihtawp thut chu an hriatthiam loh thu an tarlang bawk.

BJP sorkarin ramri hung leh FMR titawp tura thutlukna a siam chhan chu Manipur chhunga hnam tam zawk, Meitei-te tih lawm a tum vang niah an ngai. Manipur sorkarin Kuki hnamte tuarna ngaihtuah miah loa sorkar laipui hmalaknaa lawmthu a sawi thei chu thleibik neia rorel an nih vangin mak an ti lo tih KIM leh KCA chuan an sawi. Sorkar laipui chuan ramri hrula cheng hnam tlem zawkte dikna chanvo a palzut nia an ngaih thu an tarlang bawk.

Kuki pawl pahnihte hian India sorkarin United Nations Declaration on the Rights of Indigenous Peoples (2007) hnuaia a intiamkamna chu hnam tlem zawkte dikna humhim nan hmang chhuak se an duh tih an sawi. India sorkar chuan ram himna a ngaihtuah rualin mihring dikna chanvo pawh ngaihthah lo se an duh tih sawiin, ramri hung chu hnam tenau zawkte tan tihtawp thuai ni se an duh tih an sawi tel bawk. Mipui dodalna kara ramri hung an kaltlangpui a nih chuan India sorkar chuan humhim a tum a mipuite rilru chu a ti let hlauh thei niin an sawi bawk.