Assam tuiliana sorkar laipui hmalakna Congress MP-in duhkhawp lo

Jorhat bial, Assam aṭanga thlan tlin Congress MP Gaurav Gogoi chuan tuilian vanga buai mek, Assam-a sorkar laipui leh state sorkar hmalakna chu a duhkhawp lo tih a sawi a, tuilian tuarte tan hmalakna chak zawk hmuh a beisei thu a sawi.

Gaurav Gogoi chuan tuilian chu buaina lian tak a nih thu leh mipuite himna a ngaihtuah thu sawiin, sorkar laipui pawhin mipuite himna ngaihtuah a hma la tura a duh thu a sawi. "PM Modi hian Assam CM hi a biak tawh ngei ka ring a, mahse chief minister hian thudik tak a hre ngei em ka chiang lo a ni" tiin tuilian chungchanga mipuite tuar dan dik tak chu Assam CM Himanta chuan a hriat a rin loh thu a sawi.

Assam Congress MP hian BJP sorkar hnuaia Jal Shakti department chuan ṭhangkhatlian chhung tuilian danna siam hna chu contractor hnathawk ṭha lote hnena an pek tawh thu sawiin, hna a ṭha lo chungin contractor ngaite bawk tuilian danna siam hna hi pek an ni ṭhin tih a sawi. Tuilian danna chhia vang hian Assam hian tuilian a tuar na zual a, hmun tam takah tihchhiat niin lui kuang aṭangin mihring chenna lamah tui chu a lian ta a ni. BJP sorkar chu Jal Shakti department leh tuilian laka invenna tur scheme hmanga pawisa siam ṭhinah puhin, ATM ang chauhin an hmang niin a sawi.