Tripura : Kum 1 leh thla 5 chhungin dan loa state chhunga lut mi 434 man

Government Railway Police (GRP) chuan kum 1 leh thla 5 chhungin dan loa Tripura chhunga lut mi 434 an man a, heng zingah hian Bangladesh khua leh tuite bakah Rohnigya-te pawh an tel.

GRP hi Tripura chhung police station parukah dah niin dan loa ramri kan endik hna an thawk ṭhin a, mi 434 an man zingah hian rela chuanga hmun hrang hranga kal kual ṭhin tam tak an awm nia tarlan a ni. Kum 2023 chhung khan GRP hian dan loa lut mi 294 an man a, heng zinga mi 76 chu Rohingya an ni a, a bak zawng chu Bangladesh khua leh tui an ni thung. Kumin chhungin mi 140 man ni tawhin heng zinga pathum chu Rohingya an ni.

Ramri kan tura pui ṭhintu 'tout' an tihte pawh man tel niin heng mite hi India khua leh tui an ni tlangpui tih tarlan a ni a, nikum chhung khan mi 51 manin kuminah 26 an man tawh tih an tarlang tel bawk. Kum 2023 chhung khan dan loa ramri kan kaihhnawih thubuai ziahluh 75 awmin kuminah 28 a awm tawh bawk. GRP thuneitute chuan Tripura chu dan loa lutte chuan luhka atan hmangin helai aṭang hian India ram hmun dangah an kal leh ṭhin tih an sawi. GRP hian dan loa India rama lutte chauh ni loin ruihhlo tawlhru ṭhin leh an ruih hlo kawlte pawh an man sak ṭhin a ni.