Meghalaya-ah tuilian leh leimin vangin nunphung a khaihlak

Meghalaya-ah chuan fur ruah tui tla a tam avangin hmun hrang hrangah tuilian leh leiminin mipui nunphung a tikhaihlak hle a, chhiatna tawkte chhawmdawl turin chhanchhuaktu pawlte pawh chhiatna thlenna hmunah tirh luh tawh an ni.

Meghalaya state chhungah hian June 1, 2024 hnuah ruah sur hi 44% zetin a pun belh nia chhut a ni a, hemi avang hian leimin leh sabereka-khuang-kaih vangin district hrang hrangah kawngpui leh hmasawnna ruhrel dangte a chhiat phah a ni. East Khasi Hills-ah lui lianin mi pakhat lain a ruang hi hmuh a ni tawh a, Meghalaya chief secretary chuan chhiat tawk chhungte zángnadawmna pe turin thu a chhuah tawh a ni.

West Garo Hill district-a khaw pali- Pattangre, Dabelagre, Kopogre leh Sapalgre chu tlawhpawh theih lohin an awm mek a, mipui nitin mamawh chu lawng hmanga thiar luh a ni. East Jaintia Hills a NH-6 a leimin vanga kawng ping erawh a tlang leh tawh, hemi bakah hian hmun dang 17-a leimin awmte chu thenfai hna thawh ni tawh mah se kawng chhe siam hna erawh thawh mek a la ni thung.

Meghalaya sorkar chuan District Collector-ten a ṭul huna an hman turin Rs vbc 13.5 a dah hrang a, chief secretary chuan pawisa hi dah belh a ni dawn tih a sawi bawk. CS Wahlang chuan kawng pingte a tlang thuai a ngai tih sawiin a bikin a tuar na zual West Garo Hills chu ngaih pawimawh hmasak a ngai tih a sawi. CS hian district thuneitute chu darkar 24 chhungin chhiatna thlenna hmunah nitin mamawh bakah inthiarna, tui in tur leh damdawi mamawhte thlen turin a hriattir bawk.