KMSS-in Akhil Gogoi chhuah phutin campaign

Assam-a Krishak Mukti Sangram Samity (KMSS)chuan an pawl hruaitu, Akhil Gogoi chhuah phutin state pum huapa campaign an nei ṭan. Gogoi hi Citizenship (Amendment Act) duh lohna a lantir avangin nikum December thla khan man a ni. 

KMSS hruaitute chuan Gogoi chhuah phutna campaign chu mipuite pawhin an thlawp ṭhat an beisei thu an sawi. Mi hrang hrang hnen aṭangin Gogoi puala thilpek, cheng nuai 22 an dawng tawh tih an sawi bawk. 

CAA duh lohna a lantir avanga Assam police-ten an man hnuah, Gogoi hi National Investigation Agency (NIA) kutah an hlan leh a ni.

KMSS hian nakkum assembly inthlana chuh turin political party din an tum thu an puang tawh a, an party hming tur chu jail aṭanga Gogoi a chhuah hnuah a puang dawn a ni, an ti. Gogoi hi party chief ministerial candi­date atan an puang tawh bawk.