Assam : Tuilian vangin mi 70 thi tawh

Assam State Disaster Management Authority (ASDMA) in a tarlan danin, state chhungah tuilian vangin mi 70 in nunna an chan tawh. Assam chhunga district 30 in tuilian hi tuarin mi maktaduai 2.42 a nghawng mek a ni.

Assam-ah hian fur ruah tui a tam vangin state chhungah tuilian mai bakah leimin a tam hle bawk. Khuarel chhiatna dang, thlipui vangin chhiat an tawk bawk a ni. Ruah sur nasa hian hmun hrang hrangah lui a lian a, nunphung a tikhaihlak hle. Mihring nunna mai bakah ran vulh laiin an tuar bawk a, hei bakah hian hmun tam takah hmasawnna ruhrel a chhe nasa hle bawk.

District zinga a tuar na ber pawl, Barpeta district-ah khaw 179 chuan tuilian hi an tuar a, mi nuai 1.4 in a nghawng an tuar mek a ni. State chhunga thlai chinna hmun hectares 63,490.97 chu tuilian hian a chim bawk a ni. Tuilianin a nghawng an tam avangin chhanchhuaktu pawl lamin chhan chhuah hna an thawk reng a, mipuite hmunhim lama thiar chhuah tumin ṭan an la reng a ni.

Congress party hruaitu, Priyanka Gandhi Vadra chuan Assam-a chhiatna thleng mek chu pawi a tih thu sawiin, nunna chan an awm leh chenna hmun chhuahsan ngai an awm chu pawi a ti takzet tih a sawi. Assam chhunga Congress worker-te chu chhanchhuah hnathawh mek chu an theihna zawna pui turin a chah a, state sorkar leh sorkar laipui chu ṭanpui ngaite tan a rang thei ang bera ṭanpuina pe chhuak turin a ngen bawk.

Lok Sabha Leader of Opposition, Rahul Gandhi pawhin tuilian vanga buaina tawk mek Assam chu ngaihtuah a ngai hle niin a sawi. Gandhi hian Manipur tlawh tura a kal hmain Silchar, Assam-a tuilian tuarte chu vawiin hian tlawh a tum nia tarlan a ni.