Manipur-ah Rahul Gandhi kal dawn

Lok Sabha Leader of Opposition, Congress party hruaitu Rahul Gandhi chuan vawiin hian Manipur a tlawh dawn tih Congress party chuan an tarlang. State chhunga buaina a chhuah hnuah Rahul Gandhi hian Manipur hi vawi hnih a tlawh tawh a, a ṭum thum tlawhna turah hian chhawmdawlna-inte a tlawh bakah Manipur Congress hruiatute nen an inkawm dawn a ni.

Rahul Gandhi chuan thlawhtheihna hmangin Delhi aṭangin Silchar a pan anga, heta ṭang hian Jiribam district a pan dawn niin Manipur Congress hotupa K Meghachandra chuan a sawi a, district chhunga chhawmdawlna-inte a tlawh kual hnuah Silchar airport pan lehin heta ṭang hian Imphal lama a pan dawn niin Meghachandra chuan a sawi. Imphal aṭang hian Churachandpur district-ah kalin chhawmdawlna-ina awm mek raltlante nen an titi ho dawn tih a sawi bawk. Churachandpur aṭang hian Moirang, Bishnupur district a pan leh anga, chhawmdawlna-in tlawh leh tura ruahman a ni bawk. Hemi hnu hian Delhi lamah a kir leh ang.

Manipur Congress Legislature Party leader O. Ibobi Singh chuan May 3, 2023 a Manipur a buai hnuah Gandhi hian ṭum hnih lai state hi tlawh tawhin mipuite tawrhna hrethiam turin chhawmdawlna-inte a tlawh ṭhin tih a sawi. Rahul Gandhi-a'n Bharat Jodo Nyay Yatra a neih pawh Thoubal, Manipur aṭang hian a ṭan a ni. Rahul hian Manipur-a a cham chhung hian state chhunga Congress party hruaitute nen inkawmhona hun an nei dawn bawk nia tarlan a ni. Rahul hian Prime Minister Narendra Modi chu ṭum tak tak Manipur a tlawh loh avang hian a lo bei tawh a, Modi tan chuan Manipur state chu awm ve lo ang mai a nih thu a lo sawi tawh bawk.