'One Nation, One Election' neih hi kan mamawh a ni : Tripura CM

Tripura chief minister Manik Saha chuan rampuma a ruala inthlan, 'One Nation, One Election' chu neih ngei a pawimawh tih a sawi. Manik Saha hian inthlan dawna Model Code of Conduct (MCC) puan ṭhin chuan hmasawnna hnathawh a tihmuan ṭhin avangin a ruala inthlan neih hi a pawimawh niin a sawi.

Tripura hian Lok Sabha inthlan an hmachhawn zawh hnu lawka Panchayat inthlan, Autonomous Council leh Civil bodies inthlan an hmachhawn leh dawn a, heng inthlan neih a nih dawn avang hian MCC chu state chhungah puan a ngai leh dawn a ni. Hemi a nih avang hian CM Saha chuan rampuma a ruala inthlan huaihawt chu hmasawnna hnathawh a chak theih nan a ngai tih a sawi.

Manik Saha chuan,"Inthlan a indawt chhoh zut avang hian hmasawnna hnathawh mekte chu thla eng emaw zat chawlh lailawk a ngai leh dawn a ni. Hemi a nih avang hian a ruala inthlan hi kan mamawh hle a ni" a ti. 'One Nation, One Election' chungchang zirchiang tur hian President hlui Ram Nath Kovind kaihhruai committee chu din niin, kumin March thla khan President Droupadi Murmu hnenah report an thehlut a ni. Report hian Lok Sabha leh State Assembly inthlan chu a ruala neih hmasak ni se, hemi hnu ni 100 chhungin a ruala local body inthlan nei leh turin ruahmanna an thlen a ni.