AP-ah Covid-19 Kai 4,112 tling tawh

Arunachal Pradesh state surveillance officer Dr L Jampa chuan nimin khan hri kai hmuh thar mi 78 awm lehin, an state-a Covid-19 kai hmuh tawh chu mi 4,112 an tling tawh tih a sawi. 

Nimina hri kai hmuh thar zingah hian security force mi leh sa 18 an tel a, Capital Complex region-a mi 22 an tel bawk. Mi paruk chuan taksa lamah harsatna an nei a, a dangte erawh chu asymptomatic vek an ni thung. Nimin vek khan hri kai zinga 63 chu an dam tawh avangin hospital aṭangin chhuahtir an ni. 

State chhunga hri kai hmuh tawh zinga 2,885 chu enkawl dam ni tawhin mi pasarihin an thihpui tawh thung. Enkawl mek mi 1,220 an la awm. August thla chhung bikin hri kai enkawl dam hi 2,058 an awm a, hemi hun chhung vek hian hri kai hmuh chhuah 2,509 an awm bawk. 

AP-ah hian nimin thleng khan sample 1,67,615 test a ni tawh a, Thawhṭanni bik khan sample 3,081 test a ni.