District tharah Sadar Hills puang ta

Manipur sorkar chuan Sadar Hills chu district-ah a puang ta.

Thadou pawl hrang hrang chuan Pathianni khan July chawlhkar hmasa ber ral hma ngeia district pe tur hian an lo nawr tawh a ni. Sadar Hills district puitlinga hlankai a nih theih nan hian nasa takin an bei a, sorkar-ah ngenna vawi tam tak an siam tawh bawk. Pawl hrang hrangte chuan Joint meeting neiin Sadar Hills chu district-a hlankai an duh thu hi an lo au chhuuahpui tawh a ni.

Thadou bodies thupuangtu Henkai Sitlhou chuan, "Meeting-ah hian district pek an nih theih nan hian sorkar chu na zawka nawr kan rel a, Sadar Hills atanga MLAs leh MDCs pawh an nihna basan turin kan ngen hial a ni", a ti. Sitlhou chuan Sadar Hills district-a hlankai a ni ta chu lawmawm a tih thu sawiin, economic, social leh political-ah te nasa taka hmasawnna a thlen tur thu a sawi. District pek an nih theih nan hian kum 40 chuang zet an bei tih sawiin, a hlawh tlinna an hmu ta chu an lawm tak zet tih a sawi. Bulṭantu leh a tawp thlenga beitute zawng zawng chungah lawmthu sawiin, an zavaia hlawhtlinna a ni, a ti bawk. Sorkar-in kawng hrang hranga an thilphut a tikhawtlai chu pawi a tih thu a sawi lang bawk.

Sadar Hills hi Manipur state-a hnam hrang hrang awmkhawm an ni a, a tam zawk chu Kuki,Nepali leh Naga te an ni. Kum 1972-a Manipur state-a hlankai a nih aṭang khan district pek an phut a, Manipur (Hill Areas) Autonomous District Council Act, 1971 (vide Section 4 of Sub-Section 3, Bill No. 76 of 26/12/1971) chu hills area a cheng te leh tribal te humhimna atan hman an phut bawk a ni. Manipur-ah hian he dan hi Autonomous District Council paruk - Manipur North Autonomous District (Senapati), Sadar Hills Autonomous District (Sadar Hills), Manipur East Autonomous District (Ukhrul), Tengnoupal Autonomous District (Chandel), Manipur South Autonomous District (Churachandpur) leh Manipur West Autonomous District (Tamenglong)-ah te hman mek a ni.

Kum 1974 khan Sadar Hills District Demand Committee (SHDDC) din a ni a, ṭhalai mi eng emaw zat chuan district pek an nih theihna tura an beihna ah hian nunna an chan tawh a ni. Kum 1981 khan an hruaitu Seikeng Haokip chu police ten an kap hlum. Kum 2011 khan '92 days economic blockade' chu SHDDC hian an lo kalpui tawh a, Memorandum of Understand-ing (MoU) chu 31 October 2011 khan Manipur sorkar nen an ziak a, state sorkar chuan Sadar Hills chu district a hlankai a lo remti tawh a ni.