‘Sugar Scam’ : NPP ten CBI chhuitir phut

National People's Party (NPP) national president Conrad K Sangma (C), party thu-puangtu James K Sangma leh Meghalaya state party president WR Kharlukhi te chuan Thawhṭanni khan ‘Sugar Scam’ chung changah press conference an nei.

National People’s Party (NPP) chuan Cong-ress kaihhruai Meghalaya sorkar-in Public distri-bution system (PDS) hnuaia Sugar (Chini) a semchhuah danah thil fel lo tam tak a awm tih sawiin, Central Bureau of Investigation (CBI) chhui tir an phut tih an sawi. State sorkar chuan consumer hnenah kg khat cheng 20 zelin a pe chhuak a, hetih lai hian sorkar laipui chuan subsidy-in kg khat cheng 18.50 zela pek chhuah turin a ti a, a bang zawng hi state sorkar chuan sumdawng hnenah a hralh a ni, an ti. Kum 2014 khan state sorkar chuan kg khat cheng 43.20-in Kendriya Bhandar aṭangin a lei a, kg khatah chhiah cheng 4.70 zel a chawi. September 2015 khan Supply department chuan tender thar chhuahin a chhang hniam ber Garden Court Distilleries Pvt Ltd (44.30 per kg) chu hnawlin, Kendriya Bhandar bawkin a supply leh a ni.

Hetih lai hian NPP chuan Supply department chuan thla hnih hnuah tender an chhuah leh niin an sawi a, Beta Edibles Processing Private Limited (54,270 per metric ton or 54.27 per kg) chu state sorkar chuan a thlang leh a ni, an ti. NPP thupuangtu James Sangma chuan, "Eng vanga a man hniam zawka lak theih reng a nih lai a a manto zawk thlang nge an nih? Mawhphurtu Civil Supplies and Consumer Affairs Minister Clement Marak hi bang turin kan phut a ni", a ti a. Hemi chungcahng hi sawifiah turin an phut thu leh, CBI ngei chhui tir an duh thu a sawi bawk. Supply department official chuan sugar supply tur hian Beta Edibles Processing Private Limited chu thlan a nih loh thu an sawi ve thung.