NE-ah environment clearance pe chhuak hnem

Central-a BJP kaihhruai NDA sorkar kum hnih chhungin hmarchhak hmasawnna tura project kalpui a nih theih nan environment and forest clearance ṭhahnem tak pek chhuah a ni tawh a, hydroelectric project aṭanga power siam chhuak tawh zat chu MW 6,000 a ni.

Hmarchhak hmun hrang hrangah project kalpui a nih theih nana NDA sorkarin environment and forest clearance a pek zingah hian Assam leh Arunachal Pradesh te chu tam zualna a ni. ‘New Initiatives and Reports 2014-2016’ report-in a tarlan dan chuan, sand and stone mining project Kamrup leh Nagaon South Division-ah te kalpui a nih theih nan forest clearance pek an ni a, railway line Maynaguri-Jogighopa leh NETCL 440 KV transmission line te pawh pek an ni. Heng bakah hian Tikak Extension-a coal mining project 0.20 MTPA project kalpui a nih theih nan te clearance hi pek a ni tawh bawk. Report-a a landan chuan thermal power mamawhna a san zel avangin tam zawk pe chhuak tura ruahmanna siam mek a ni bawk.

Indian Oil Corporation Ltd enkawl Guwahati-a INDMAX Refinery unit te, Arunachal Pradesh-a hydroelectric power project pathum MW 3,120 pe chhuak thei tur Saskang Rong, Dibang leh Kantangshiri a mi te chu clearance hi pek an ni tawh. Environment clearance pek zingah hian 2,800 MW Dibang hydroelectricity te, cheng vaibelchhe 2,537 senna tur multipurpose project Dibang district a mi te chu an tel a, Power, irrigation, agriculture leh flood control siamna atan te clearance hi pek an ni bawk. 132 KV transmission lines – Tezu-Namsai, Switchyard-Pare leh Nirjuli- Dikrong bakah hian MW 80 pe chhuak thei tur Kantangshiri hydroelectric project hnathawhna turin ramngaw ṭhiah phalna hi pek a ni tawh bawk. Heng bakah hian kawngpui siamna tur Along-Dime-Migging-Tuting, Akajan-Likabali-Bame, Kimin-Potin, Kibithu-Thochu, Hunli- Metengliang-Hayuliang, Dirangamadela Road, Akajan Road leh Bile-Migging te chu environment and forest clearance hi pek an ni.