Meghalaya : ILP hman duhin KSU-in ILP check gate an siam

Khasi Students' Union (KSU) chuan Meghalaya chhunga Inner Line Permit (ILP) hman an duh tih lantir nan, Ri Bhoi district-a National Highway-6 ah kar liam ta Inrinni khan ILP check gate an siam.

KSU hmalakna hi sorkar laipui karna tura tih a ni a, Meghalaya Assembly in kum 2019-a ILP hman duhna resolution an pawm chungchangah central sorkar hian hmalakna a neih mai loh vangin zirlai pawlte hian ILP check gate siamin sorkar laipui hi an nawr ta a ni. KSU hian state sorkar chu Meghalaya Residents Safety and Security Act (MRSSA) a hman loh vangin a sawisel bawk. KSU president Lambokstarwell Marngar chuan Meghalaya chhunga ILP hmang tura state sorkar leh sorkar laipuiin hma an lak loh chuan an lungawi lohna lantir chu tawpsan mai an tum lo tih a sawi.

KSU hian state chhunga lirthei lut turte chu ILP check post an siamah hian lo tidingin Meghalaya chhunga lut turte document a fel fai em tih an lo ensak a ni. Ri-Bhoi Deputy Commissioner Abhilash Baranwal chuan KSU lungawi loh lantirna chuan buaina lian tham a thlen lo tih sawi. Baranwal chuan District Magistrate leh KSU hruaitute an inbiak hnuah zirlai pawlte chuan ILP check post an siam chu an chhuahsan zui niin a sawi bawk.

Meghalaya chhungah hian ILP hman duhna hi kum 2019-a Citizenship Amendment Act pawm a nih hnuah a lian hle a, state assembly chuan lungrual takin ILP hman duhna resolution chu a lo pawm tawh a ni. Sorkar laipui chuan ILP hman a nih theih nan hian hma a la chak lo niah ngaiin Meghalaya chhunga tlawmngai pawl hrang hrangte chuan sorkar laipui chu nawr ṭhin mah se awmzia a la awm thei lo a ni. ILP hi hmarchhak state pali- Arunachal Pradesh, Nagaland, Manipur leh Mizoramah hman niin ram leilung fa ni lote chuan heng state chhung an luh dawn hian phalna an lak hmasak phawt a ngai a ni.