Manipur : September thla ral hmain thing ṭiak vbc 4 phun hman tum

Manipur Minister for Forest and Environment, Thongam Biswajit chuan state chhunga thingkung a tam nan September thla ral hmain thing ṭiak vaibelchhe li sorkarin phun hman a tum tih a sawi.

Thongam Biswajit hi 75th Van Mahotsav lawmnaah khuallian niin Lamdeng Makha Leikai, Imphal West district-ah thing ṭiak engemaw zat an phun nghal a ni. Van Mahotsav lawmna hi Forest department in an huaihawt ṭhin a, ramngaw humhalh ṭulzia inzirtir nan leh thingkung pawimawhna inzirtirna hun atana hman ṭhin a ni. Biswajit chuan, 'Kumtin square kilometre 420 a zau ramngaw ṭhiah ni ṭhin anga chhut a ni a, hetiang renga kum 10 emaw 15 emaw chhung kan kal a nih chuan ramngaw leh nungcha a chereu nasa hle dawn a ni,' a ti.

Forest Minister Biswajit-a'n thu a sawinaah hian state chhunga tuilian vanga harsatna an tawh mek chungchang sawi lang bawkin, tuilen chhan lian tak pakhat chu ramngaw a chereu vang niin a sawi. Hemi bakah hian lui kam tih chereu leh poppy phunna hmun tam lutuk chu tuilian thlen chhanah a puh bawk. Minister chuan Imphal-a tuilen chhan chu leihnuai aṭanga tui put chhuak tam vang emaw lui kuang tih chereu vang emaw niin a sawi bawk.